Gn a t i pus qu' des vîs a djåzer e walon ?

Quand on-z etind ç' dimande la, on-z est saquants a n' wazu pus responde. I nos l' fåt ben riconeche, les djonnes d' å djoû d' ådjoûrdu n' sont pu wêre a cåzer l' lingâdje di nos ratayons. L' fåte a quî ? Branmint volnut mete tote li dossêye dissus nos bons mwinrnants d' i gn a cinquante et des anêyes. A dîre li vray, ça séréve pu rade el gosse des pârints di voye leûs efants viker dsu in pus grand pî qu' zeles. Comint arîn'-t i fé pou-z årder in lingâdje qui n' siervéve qui dins l' vîye di tos les djoûs, dins l' fosse, a l' fabrique, dsu les têres et avou les biesses dins les ståves et å pachi ? A l' diferince des curés flaminds, les nwârès cotes e l' Walonîye ni metîn' nin l' lingâdje do peûpe dins les eglîjes. Asteûre, l' catrèzime a stî metu e walon. Comben sont capâbes di co bin s' e siervu ?

*

L' RUBRIQUE do ptit RBOUTEU : Les djins qui sont pris do keûr et pudnut les drogues qui vont avou ni polnut, paret i, sapinse les on-dit), nin profiter do Cråvia. Adon, in, pou les rtinkîyâdjes, dji m' a leyî adîre qui branmint d' feûmes dimernut dsu leû fwim. Mirake ! Ene novele drogue arive dissu l' martchi. A base d' ene saqwè come des pias d' morfene, l' "Hueprumî" ni sofele nin l' song , come li bleûwe pulule, dins l' osti a-z agayoler. I done djusse li côp d' flaya qu' i fåt a l' boune place do cervia. L' suksès est garanti a 47 ou minme 57 å cint dins les quinze munutes qui chûvnut ! Est ce bin asséz pou awè l' timp d' bin fé griper les montêyes viè les nuwâdjes a medeme ? C' n' est nin pou ça qu' i vos fåt coru tot d' chûte amon l' apotikêre, ça n' va reche qui li prumî d' julet. Di totes façons, in tot biesse placebo (come deus gotes d' eûwe dissu in boket d' suk) arive a fé tot parêy avou 25 omes å cint !

Di qwè sayî di rplonker pou comincî dssu l' vîye pile di Plaîbwès å gurnî. Nonna ?

*

Ene binde di sinçieus e l' France vegnnut d' ariver å coron d' ene etûde et s' rinde compte qui les éfants a l' fachete tetnut pu rade quand i z etindnut djåzer dins in ôte lingâdje. A s' dimander si l' Bill, n' e profitéve nin pou dicter ses letes e francès quand i fiéve sayî ses cigâres...

*

El POUTRELE et l' FISTU DI STRIN : E l' Bresil, dins 561 teritwêres qui, tertos echene, ont l' surface del France et d' l' Espagne, viknut co 330.000 Indyins. Seûlmin, c' qu' i gn a e l' têre n' est NIN da zels. Portant c' est tot plin d' ritchesses. Ça lzeû passe don padzo l' néz MINS c' est a zeles qu' on rprotche les mannètès polucions leyîyes pa les "otorisêyès" soces minyêres et adon d' iesse oblidjî d' vinde les åbes di leûs bwès...

E l' Walonîye, pou c' qui est des biesses d' amon nos ôtes, 6,7 å cint n' sont dedja pus qui d' sovnance; 9,6 å cint e sont a fé leûs papîs et 17 å cint qui balzinnut dpus qu' i n' fåréve. TOS les ans, on distrût etou 16 carés kilometes di natûre ! Dîre qui nos estans des bin-z-apris, des djins qu' ont plin d' l' educ, nos ôtes !

*